Лінкі ўнівэрсальнага доступу

BYPOL паведаміў пра самагубства ў Воршы падпалкоўніка міліцыі


Ілюстрацыйнае фота

BYPOL, грамадзкая ініцыятыва былых беларускіх сілавікоў, паведаміла ў сваім тэлеграм-канале пра самагубства, якое ўчыніў у Воршы падпалкоўнік міліцыі Руслан Кавальчук.

Паводле зьвестак ініцыятывы, 21 красавіка каля 12.00 у сваім службовым кабінэце застрэліўся з табэльнага пісталета начальнік групы наркакантролю і процідзеяньня гандлю людзьмі Аршанскага РАУС падпалкоўнік міліцыі Кавальчук Руслан Уладзімеравіч, 1984 году нараджэньня.

Паведамляецца, што ў сувязі са здарэньнем у 13.30 у Аршанскі РАУС прыбыў начальнік УУС Віцебскага аблвыканкаму Любімаў, а праз гадзіну — міністар унутраных спраў Кубракоў.

Пазьней дзяржаўнае агенцтва БелТА паведаміла са спасылкай на прадстаўніцу Сьледчага камітэту па Віцебскай вобласьці Аксану Лазько, што цела супрацоўніка знайшлі ў службовым кабінэце і што вядзецца праверка.

Паводле інфармацыі, якую атрымаў BYPOL, яшчэ ўчора Кaвальчука бачылі жыцьцярадасным у таварыстве жонкі і дзяцей, якія каталіся на роварах. Раніцай у сераду ён узяў удзел у занятках па фізычнай падрыхтоўцы, атрымаў табэльную зброю, ня выявіўшы ў паводзінах нічога дзіўнага.

Пазьней яго знайшоў мёртвым падначалены, які зайшоў удакладніць рабочую інфармацыю. Стрэлу практычна ніхто ня чуў, што можа быць растлумачана таўшчынёй сьцен у будынку РАУС і падвойнымі жалезнымі дзьвярыма ў службовы кабінэт Кавальчука.

Па факце самагубства Кавальчука цяпер праводзіцца службовая праверка пад асабістым кантролем міністра Кубракова, паведамляе BYPOL.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG