Лінкі ўнівэрсальнага доступу

Чаму Лукашэнка абрынуўся на прыватны бізнэс


Аляксандар Лукашэнка падчас выступу 12 лютага

Аляксандра Лукашэнку абурыў бяскрыўдны выступ на Ўсебеларускім народным сходзе кіраўніцы Бізнэс-саюзу прадпрымальнікаў і наймальнікаў імя прафэсара М.С.Куняўскага Жанны Тарасевіч. Даўно мы ня чулі такой нянавісьці да бізнэсу і багатых увогуле, піша палітычны аглядальнік Валер Карбалевіч.

У прамове Тарасевіч прагучалі традыцыйныя пажаданьні бізнэсу да ўраду, якія гучаць шмат гадоў: каб улады не «кашмарылі» прадпрымальнікаў, каб была забясьпечана роўнасьць дзяржаўнага і недзяржаўнага сэктару і інш.

Але Лукашэнка пасьля гэтага нечакана ўзяў слова. Даўно мы ня чулі такой нянавісьці зь яго вуснаў да недзяржаўнага сэктару, супраць багатых увогуле. Хіба што такое гучала ў 1990-я, калі Лукашэнка назваў бізнэсоўцаў «вашывымі блохамі». Цяпер ён абурыўся самім фактам, што бізнэсоўцы зарабляюць больш, чым іхныя работнікі.

Лукашэнка назваў бізнэсоўцаў «мярзотнікамі», паабяцаў, што іх будуць душыць, іпэшнікаў «прывядуць у прытомнасьць». Ніякага раўнапраўя паміж дзяржаўным і недзяржаўным сэктарамі ня будзе. Прыватныя кампаніі будуць «выразаць». «Няхай лепш зьедуць, чым тут перавернуць краіну», — казаў Лукашэнка.

З чаго раптам такі выбух нянавісьці да прыватнага бізнэсу? Зь ягоных намёкаў стала зразумела, што прычына тут выключна палітычная. Падчас вострага крызісу мінулага году бізнэс не падтрымаў Лукашэнку. Вось і ўся прычына. І Лукашэнка кіруецца прынцыпам: «Хто ня з намі, той супраць нас». Усё, што неляяльнае яму ў краіне, павінна быць зьнішчана.

Узьнікла сытуацыя, калі выжываньне існага рэжыму і разьвіцьцё прыватнага бізнэсу сталі ў жорсткай супярэчнасьці адно да аднаго. Хтосьці ў гэтым супрацьстаяньні павінен саступіць.

Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG