Лінкі ўнівэрсальнага доступу

«У мамы ў камэры 8 чалавек, у брата — 13». Кіраўніцтва «Прэс-клюбу» за кратамі ўжо 13 дзён


Юлія Слцукая, заснавальніца беларускага «Прэс-клюбу»

Юлію Слуцкую і шэраг іншых супрацоўнікаў «Прэс-клюбу» вінавацяць ва ўхіленьні ад выплаты падаткаў і спрыяньні гэтаму.

31 сьнежня выставілі абвінавачаньні

  • Юліі Слуцкай, заснавальніцы «Прэс-клюбу»,
  • Сяргею Альшэўскаму, фінансаваму дырэктару,
  • Але Шарко, праграмнай дырэктарцы,
  • Пятру Слуцкаму, апэратару,
  • Дзянісу Сакалоўскаму, апэратару.

Усіх іх утрымліваюць пад вартай у СІЗА № 1 на вуліцы Валадарскага ў Менску.

Кіраўніка Акадэміі «Прэс-клюбу» дэпартавалі ў Расею

Кіраўніка Акадэміі «Прэс-клюбу», грамадзяніна Расеі Сяргея Якупава, у той жа дзень пад канвоем даставілі ў менскі аэрапорт і дэпартавалі з краіны.

Як расказаў Свабодзе сам Якупаў, яму не прад’явілі абвінавачаньня, ён мае статус свабоднага чалавека, усе падазрэньні зь яго зьнятыя.

Камэнтаваць сытуацыю ён пакуль не гатовы.

«Мама настроеная канструктыўна»

Дачка Юліі Слуцкай і сястра Пятра Слуцкага Аляксандра кажа, што асаблівых навінаў наконт абвінавачаньня і расьсьледаваньня справы пакуль няма. Адвакаты маюць магчымасьць бачыць сваіх падабаронных.

«У мамы ў камэры сем чалавек, — расказвае Аляксандра. — Яна восьмай прыйшла туды, ёй заставалася верхняя шконка. У мамы хворая сьпіна, ёй цяжка было туды залазіць і злазіць. Але дзяўчаты ў камэры добрыя, яны зь ёй памяняліся. Цяпер у мамы хаця б зручная шконка».

Аляксандра кажа, што маці нават прасіла не перадаваць ёй столькі ежы.

«Бо ня выйдзе зь СІЗА, не пралезе ў дзьверы. Такія жарты, — кажа дзяўчына. — Мама настроеная канструктыўна. Стараецца не засмучацца ад таго, чаго ня можа зьмяніць. Робіць гімнастыку па магчымасьці. Месца ў камэры няма, таму некаторыя практыкаваньні даводзіцца рабіць на шконцы. Любы паход у лазьню альбо да адваката таксама стараецца пераўтварыць у нейкую гімнастыку».

Таксама Аляксандра расказвае, што на сьвяточныя дні пра маці ў яе ёсьць гісторыя пра тайнага Санту.

«Мы павінны былі ладзіць карпаратыў, я пошту сваю праверыла 23 сьнежня. І там аўтаматычная рассылка даслала мне паведамленьне «Прывітаньне, я Юлія Слуцкая, ты мой тайны Санта. Так што вось у мяне атрымалася пагуляць у тайнага Санту», — кажа яна.

Па словах Аляксандры Слуцкай, разам з жонкай Сяргея Альшэўскага яны абмяркоўвалі затрыманьне сваіх блізкіх і выстаўленыя ім абвінавачваньні. Гатовыя цалкам кампэнсаваць нанесеную дзяржаве шкоду, калі яна была.

«У Пятра ў камэры 13 чалавек, — расказвае Аляксандра Слуцкая пра ўмовы, у якіх утрымліваюць яе брата. — Таксама абстаноўка даволі пазытыўная. Усе хлопцы добрыя. Пятро трымаецца. Але ён увогуле не разумее, што адбываецца. У Пятра быў адвакат, ён яму патлумачыў, што і як, як трэба сябе паводзіць. Пятро ўвогуле ня ў тэме, як той казаў».

Юлія Слуцкая і іншыя супрацоўнікі «Прэс-клюбу» прабудуць пад вартай мінімум да 22 лютага. Акрамя іх на гэты момант пад вартай у крымінальных справах утрымліваюць журналістку парталу Tut.by Кацярыну Барысевіч, супрацоўніц «Белсату» Кацярыну Андрэеву і Дар’ю Чульцову, а таксама былую карэспандэнтку БТ Ксенію Луцкіну, якую затрымалі ў адзін дзень з кіраўніцтвам «Прэс-клюбу».

Што такое «Прэс-клюб»

«Прэс-клюб» — гэта «пляцоўка для прафэсійнага разьвіцьця мэдыясупольнасьці», «нефармальнае аб’яднаньне мэдыяпрафэсіяналаў, усіх тых, хто жадае ўдасканаліць журналісцкія ўменьні і працаваць у рытме прафэсійных стандартаў і трэндаў».

«Прэс-клюб» заснаваны ў 2011 годзе. У чэрвені 2014-га арганізацыя стала сябрам Міжнароднай асацыяцыі «Прэс-клюбаў» (International Association of Press Clubs). У лістападзе 2015-га ў Беларусі зарэгістравалі культурна-асьветніцкую ўстанову «Журналісцкая майстэрня Прэс-клюб».

«Прэс-клюб» арганізуе прафэсійныя дыскусіі, трэнінгі, варштаты для журналістаў, займаецца мэдыяграматнасьцю, маніторынгам і аналізам фэйкаў і прыкладаў прапаганды ў дзяржаўных мэдыя.

Юлія Слуцкая — заснавальніца і старшыня «Прэс-клюбу». У 1995–2006 — галоўны рэдактар «„Комсомольской правды“ в Белоруссии». У 2007–2010 — галоўны рэдактар «Эўрапейскага радыё для Беларусі».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG