Лінкі ўнівэрсальнага доступу

Акцыя пратэсту ў Менску працягнулася на плошчы Якуба Коласа, адбыліся новыя затрыманьні


Затрыманьне каля кавярні “Зерне“ недалёка ад плошчы Якуба Коласа

У цэнтры Менску ўвечары працягвалася акцыя ў падтрымку агульнанацыянальнай забастоўкі. Яе ўдзельнікі дайшлі да плошчы Якуба Коласа, дзе сталі ў ланцуг.

Каля 20.00, калі на плошчы сабралася каля 100 пратэстоўцаў, у асноўным каля філярмоніі, туды прыехалі сілавікі.

Людзі пабеглі ад іх за філярмонію ўверх па бульвары Мулявіна. За імі па сустрэчнай паласе паехалі тры мікрааўтобусы ў суправаджэньні аўтамабіля ДАІ з уключаным пробліскавым маячком.

З боку вуліцы Якуба Коласа прыехаў аўтазак, зь якога выгрузіліся сілавікі ў абмундзіраваньні.

Раней адбыліся затрыманьні каля «Макдональдса» на скрыжаваньні праспэкту Незалежнасьці і вуліцы Леніна, а таксама на Кастрычніцкай плошчы, у падземным пераходзе станцыі мэтро «Кастрычніцкая» з боку Дому афіцэраў.

Відавочца паведаміў агенцтву БелаПАН, што каля «Макдональдса» адзін зь сілавікоў «раіўся» з другім, паказваючы на хлопца: «Можа, гэтага возьмем?».

Уздоўж праспэкта шпацыравалі людзі, паказвалі знакі «вікторыя», аўтамабілісты ім сыгналілі. Пэрыядычна праяжджалі мікрааўтобусы зь сілавікамі.

Групы людзей са сьцягамі і без стаялі каля ГУМу, на плошчы Перамогі, на скрыжаваньні праспэкту Незалежнасьці і вуліцы Казлова.

У сацыяльных сетках зьявіўся відэазапіс з плятформы станцыі мэтро «Кастрычніцкая», на якой невядомы з дубінкай спрабуе затрымаць маладога чалавека. За яго заступіліся іншыя пасажыры. Ля эскалятараў завязалася бойка.

Паведамляецца пра затрыманьні каля станцыі мэтро «Пушкінская», дзе 10 жніўня загінуў удзельнік пратэстаў Аляксандар Тарайкоўскі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG