Лінкі ўнівэрсальнага доступу

Месяц пратэстаў. Калесьнікаву і паплечнікаў падазраюць па крымінальнай справе. Да Алексіевіч ламіліся. Новыя затрыманьні ў Менску

Што адбываецца на 32-і дзень пратэстаў супраць фальсыфікацыі прэзыдэнцкіх выбараў.


Міліцыя ля офісу, дзе месьціцца Каардынацыйная рада, 9 верасьня
23:11 9.9.2020

Справу арыштаваных супрацоўнікаў PandaDoc перадалі ў СК

Справу чатырох супрацоўнікаў ІТ-кампаніі PandaDoc, якіх арыштавалі паводле падазрэньня ў крадзяжы ў асабліва буйным памеры, перадалі ў цэнтральны апарат Сьледчага камітэту Беларусі, расказаў 42.Tut.by адвакат Антон Гашынскі.

Сьледчых дзеяньняў зь імі пакуль не праводзяць. Да 11 верасьня ім павінны выставіць абвінавачваньне або адпусьціць.

22:19 9.9.2020

Месяц беларускіх пратэстаў у фатаздымках Свабоды. Як гэта было

Сёньня роўна месяц, як Беларусь жыве ва ўмовах пратэстаў супраць рэжыму Аляксандра Лукашэнкі. За гэты час краіна пабачыла рэкордныя па колькасьці мірныя вулічныя акцыі пратэсту, беспрэцэдэнтны гвалт з боку сілавікоў і нябачаную дагэтуль грамадзкую салідарнасьць. Прапануем вам паглядзець назад праз аб'ектыў фотакарэспандэнтаў Свабоды.

22:13 9.9.2020

Вечаровыя акцыі ў Менску

22:11 9.9.2020

Міністэрства юстыцыі абвясьціла пра незаконнасьць працы фондаў падтрымкі пратэстоўцаў

Міністэрства юстыцыі выступіла з папярэджаньнем, што дзейнасьць фондаў, якія зьбіраюць сродкі для падтрымкі пратэстоўцаў, незаконная. Не зарэгістраваныя ў Беларусі фонды, адзначае міністэрства, будуць прыцягнутыя да адміністрацыйнай адказнасьці.

«Дзейнасьць гэткіх „фондаў“ знаходзіцца па-за рамкамі прававога поля, у сувязі з чым адсутнічаюць дзейсныя мэханізмы празрыстасьці, кантролю руху грашовых сродкаў, якія трапляюць у іх распараджэньне, што можа спрыяць незаконнаму ўзбагачэньню асобаў, якія маюць непасрэднае дачыненьне да збору», — адзначылі ў міністэрстве. Цалкам чытайце тут.

22:09 9.9.2020

Звольнілі менскага пажарнага, які папярэдзіў жыхароў, што іх сьцяг едуць здымаць

9 верасьня з пажарнай аварыйна-ратавальнай часткі № 2 Фрунзенскага раёну Менску звольнілі Максіма Сташулёнка, які раней папярэдзіў жыхароў кварталу «Каскад», што МНС плянуе зьняць вывешаны паміж дамамі вялікі бел-чырвона-белы сьцяг, паведамляе «Эўрарадыё».

Акрамя працы, пажарны страціў жытло: яго высяляюць са службовай кватэры, сям’я павінна сабраць рэчы на працягу трох дзён. У хлопца цяжарная жонка і трохгадовае дзіця.

Спачатку Максіма Сташулёнка абвінавацілі ў парушэньні прысягі, двух пунктаў працоўнага кантракту і падпіскі аб неразгалошваньні. Ён не пагадзіўся, пачаў спрачацца. 9 верасьня раніцай яго зноў выклікалі да начальства — гэтым разам каб падпісаць заяву аб звальненьні. Звольнілі паводле арт. 172.6 — спыненьне службы ў сувязі з учыненьнем правіннасьці, прадугледжанай кантрактам аб службе ў якасьці падставы для яго датэрміновага скасаваньня. Да заявы прыклалі скрыншот паведамленьня з чату «Страна для жизни». Цалкам чытайце тут.

21:45 9.9.2020

Марыя Калесьнікава кажа, што ёй пагражалі фізычнай расправай

Марыя Калесьнікава пры сустрэчы з адкавкаткай Людмілай Казак распавяла, што сутыкнулася з пагрозамі фізычнай расправы, «якія, знаходзячыся ў будынку ГУБАЗіК, ўспрымаць акрамя як рэальнымі не магла». Па фактах пагрозаў пазбаўленьня жыцьця Марыя разам з адвакатам плянуе падаваць адпаведную заяву.

Падзеі апошніх дзён яна як выкраданьне і таксама плянуе падаць заяву з гэтай нагоды, распавяла прэс-служба штабу Віктара Бабарыкі ў Тэлеграме.

21:08 9.9.2020

Кіраўнік Эўрапейскай Рады заклікаў паскорыць увядзеньне санкцыяў ЭЗ супраць беларускіх уладаў

Старшыня Эўрапейскай Рады Шарль Мішэль выступіў за тое, каб як найхутчэй увесьці ў дзеяньне санкцыі Эўразьвязу адносна вінаватых у палітычных рэпрэсіях у Беларусі.

Ён заявіў, што «палітычны перасьлед у Беларусі, у тым ліку затрыманьні з палітычных матываў і прымусовая дэпартацыя, павінен быць спынены».

«Беларускія ўлады павінны вызваліць палітычных вязьняў і дазволіць грамадзянам рэалізаваць сваё права на свабоду слова і сходаў», — напісаў кіраўнік Эўрапейскай Рады.

21:02 9.9.2020

Вечаровы дваровы Менск: канцэрт Вайцюшкевіча і спэктакль «Гэта мы»​

20:36 9.9.2020

Латушка пасьля сустрэчаў у Літве і Польшчы едзе на перамовы ў Нямеччыну

«Пасьля перамоваў, якія адбыліся ў Літве і Польшчы, мы пачынаем перамовы ў Бэрліне, у МЗС Нямеччыны. Мы чакаем, што пазыцыя Эўразьвязу што да ўнутрыпалітычнага крызісу ў Беларусі будзе кансалідаванай» — заявіў чалец прэзыдыюму Каардынацыйнай рады, былы дыплямат і міністар культуры Павал Латушка.

20:29 9.9.2020

Вечаровыя акцыі ў Менску. Фота, відэа

20:28 9.9.2020

Ціханоўская, Цапкала і Калесьнікава намінаваныя на прэмію Эўрапарлямэнту імя Сахарава

Сацыял-дэмакратычная фракцыя Эўрапейскага парлямэнту намінавала Сьвятлану Ціханоўскую, Марыю Калесьнікаву і Вераніку Цапкалу на праваабарончую прэмію імя Сахарава. Інфармацыя пра гэта апублікаваная на афіцыйным партале S&D.

«Уражаныя няспыннымі мірнымі дэмакратычнымі пратэстамі ў Беларусі супраць сфальсыфікаваных выбараў 9 жніўня, мы глыбока перакананыя, што сёлетняй прэміяй Сахарава трэба ўганараваць адважных беларускіх жанчын, якія змагаюцца за свабоду і дэмакратыю ў сваёй краіне, — заявіла ў сераду намесьніца кіраўніка групы S&D Каці Піры.

Прэмію «За свабоду думкі» імя Сахарава Эўрапейскі парлямэнт штогод уручае асобам, якія зрабілі «выключны ўнёсак у барацьбу за правы чалавека па ўсім зямным шары».

20:03 9.9.2020

ПАРЭ ініцыюе стварэньне міжнароднага сьледчага органа па правапарушэньнях у Беларусі

Камітэт Парлямэнцкай асамблеі Рады Эўропы па юрыдычных пытаньнях і правах чалавека прыняў заяву аб сытуацыі з правамі чалавека ў Беларусі і прапанаваў заснаваць міжнародны Сьледчы камітэт для збору інфармацыі і доказаў аб правапарушэньнях у Беларусі — «каб даць сыгнал сілавым структурам Беларусі, што сур’ёзныя парушэньні правоў чалавека не застануцца беспакаранымі».

20:02 9.9.2020

У Магілёве аднаму зь лідэраў пратэстаў прысудзілі яшчэ 8 сутак арышту

Вэтэрану магілёўскага апазыцыйнага руху Валадару Цурпанаву дадалі яшчэ восем сутак арышту ды аштрафавалі яго на 270 рублёў за непавагу да суду. Цяпер ён адбывае ў ізалятары 20 сутак адміністрацыйнага арышту.

На 20 сутак Цурпанава асудзілі за тое, што 1 верасьня ён прыйшоў на лінейку ў 43-ю магілёўскую школу і заклікаў пэдагогаў, якія працавалі ў выбарчых камісіях, прызнаць факты фальсыфікацыі выбараў ды «пакаяцца, стаўшы на калені».

19:31 9.9.2020

Акцыя ля мэдычнага ўнівэрсытэту ў Менску

19:18 9.9.2020

Жаночая акцыя ў Менску: на Нямізе засталося менш за 10 пратэстоўцаў

На Нямізе людзі ў балаклавах зноў загружаюцца ў мікрааўтобусы. Усе, хто побач, скандуюць «Ганьба!». Пратэстоўцаў засталося менш за 10. Некалькі мікрааўтобусаў без нумароў зьехалі, засталося 4.

Невялікая групка дзяўчат пасьля ад'езду людзей у балаклавах выйшла на вуліцу Камсамольскую і ідзе ў бок праспэкту, паведамляе Tut.by.

18:58 9.9.2020

Жаночая акцыя ў Менску: працягваюцца затрыманьні

На Нямізе сілавікі працягваюць затрымліваць удзельніц акцыі салідарнасьці з затрыманай па крымінальнай справе Марыяй Калесьнікавай.

18:40 9.9.2020

Падчас акцыі ў падтрымку Калесьнікавай затрымалі ўжо дзьвюх дзяўчат

У Менску каля гандлёвага цэнтру «Няміга 3» сабралася пад два дзясяткі дзяўчат. Яны прынесьлі плякаты з надпісамі ў падтрымку Марыі Калесьнікавай, паведамляе Tut.by у Тэлеграме. Людзі падыходзяць. Па дарозе паволі катаецца мікрааўтобус без нумароў.

На плякатах напісана «Ці гатовыя ўкрасьці, пасадзіць і выгнаць сотні тысяч жанчын? Ну-ну, героі», «Добрая Маша, але ня ваша».

Зьявіўся міліцыянт з мэгафонам, кажа, што мерапрыемства не санкцыянаванае, просіць разысьціся. Прыйшлі каля 10 «зялёных чалавечкаў» у балаклавах. Журналістаў просяць адысьці на 50 мэтраў у мэтах бясьпекі.

Пачаліся затрыманьні: затрымалі дзьвюх дзяўчат, грузяць у мікрааўтобус.

18:35 9.9.2020

За дзень да манэўраў «Славянскае братэрства 2020» у Беларусі Сэрбія адмовілася ў іх удзельнічаць

На сэсіі 9 верасьня ўрад Рэспублікі Сэрбія прыняў рашэньне аб прыпыненьні ўсіх вайсковых вучэньняў і ўсіх вайсковых мерапрыемстваў з усімі партнэрамі ў бліжэйшае паўгодзьдзе. Пасьля пасяджэньня ўраду міністар абароны Аляксандар Вулін заявіў, што Сэрбія знаходзіцца пад жахлівым і незаслужаным ціскам Эўразьвязу.

«Нас просяць адмовіцца ад заплянаваных вайсковых вучэньняў зь Беларусьсю пад пагрозай разьвітаньня з нашай эўрапейскай будучыняй, яшчэ большага ціску на нашу палітыку і на нашых людзей у Косаве і Мэтохіі і Рэспубліцы Сэрбскай [у складзе Босьніі і Герцагавіны. — РС]», — падае словы Вуліна Міністэрства абароны.

Напярэдадні Мінабароны Беларусі паведаміла, што вайсковыя вучэньні «Славянскае братэрства 2020», у якіх удзельнічаюць узброеныя сілы Расеі, Беларусі і Сэрбіі, пройдуць у верасьні, прыбыцьцё ўдзельнікаў чакаецца ад 10 да 15 верасьня. Цалкам чытайце тут.

18:28 9.9.2020

Парталу Tut.by вынесьлі трэцяе папярэджаньне з 7 жніўня. Абмежаваць доступ маглі ўжо пасьля двух

Міністэрства інфармацыі вынесла афіцыйнае папярэджаньне кампаніі «Тут бай медыа» за артыкул «К редактору TUT.BY пришли силовики. На ее дочь завели уголовное дело о массовых беспорядках».

Сьцьвярджаецца, што крымінальная справа супраць Валерыі Ўласік на самой справе не заводзілася, а ператрус праводзіўся «ў мэтах праверкі інфармацыі аб датычнасьці яе да арганізацыі масавых беспарадкаў». Асобы, якія далі Галіне і Валерыі Ўласік пастанову на ператрус, заяўлялі пра падазрэньне ў гэтай крымінальнай справе. Журналісты Tut.by неаднаразова спрабавалі ўдакладніць статус Валерыі ў Сьледчым камітэце, там ім сытуацыю не патлумачылі.

Папярэдняе папярэджаньне ТАА «Тут бай медыа» атрымала 7 верасьня, яшчэ адно – 7 жніўня. У адпаведнасьці з Законам аб СМІ, у выпадку вынясеньня ўладальніку сеткавага выданьня 2 і больш пісьмовых папярэджаньняў на працягу году доступ да сеткавага выданьня можа быць абмежаваны. Рашэньне аб гэтым прымае Міністэрства інфармацыі Беларусі.

18:14 9.9.2020

Адвакатка Калесьнікавай: «Марыя ня з тых людзей, на якіх такія абставіны могуць паўплываць і пераламаць іх пункт гледжаньня»

Адвакатка Марыі Калесьнікавай Людміла Казак распавяла Свабодзе пра працэсуальны статус і ўмовы ўтрыманьня яе падабароннай у менскім СІЗА нумар 1 на вуліцы Валадарскага.

— Абвінавачваньня няма, будзе яно ці не, залежыць ад працы сьледзтва. На гэта ёсьць 10 дзён для прад’яўленьня, калі ж гэтага ня будзе, то яе павінны будуць вызваліць.

— Якое яе здароўе і самаадчуваньне пасьля выкраданьня, падзей на мяжы і затрыманьня?

— Самаадчуваньне яе з большага ў парадку, але канешне такі стрэс яна перажыла, і ўмовы яе знаходжаньня цягам апошніх некалькіх дзён былі ня лепшыя. Калі ёй была патрэбная мэдыцынская дапамога, яна ёй надавалася. Нараканьняў тут няма. А яна сапраўды зьвярталася па мэдыцынскую дапамогу, ціск быў падвышаны, сэрца пабольвала".

— Якія ўмовы яе ўтрыманьня?

— Яна знаходзіцца ў СІЗА на Валадарскага ў Менску, у агульнай камэры з шасьцю жанчынамі. Я думаю, што яна справіцца з такімі не зусім добрымі ўмовамі. Можа, нешта памяняецца бліжэйшым часам, пабачым«. Я ў камэры не было, але там умова як ва ўсіх камэрах у нашым СІЗА. Камфорту там мала. Але ніякіх прэтэнзій яна не высоўвала, таму я гэтую тэму не разьвіваю. Цалкам інтэрвію з адвакаткай Калесьнікавай чытайце па спасылцы.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG