Лінкі ўнівэрсальнага доступу

Нядопуск мітрапаліта Кандрусевіча ў Беларусь. Што напісана ў законах, што гавораць Лукашэнка і іншыя чыноўнікі


Арцыбіскуп Тадэўш Кандрусевіч — мітрапаліт Менска-Магілёўскі.

БПЦ і Ўпаўнаважаны ў справах рэлігій не камэнтуюць забароны на ўезд мітрапаліту Кандрусевічу Мітрапаліта Менска-Магілёўскага, арцыбіскупа Тадэвуша Кандрусевіча.

31 жніўня не ўпусцілі ў Беларусь, калі ён вяртаўся са службовай выправы з Польшчы. Ніводная дзяржаўная ўстанова не паведамляе прычыны і не камэнтуе сытуацыі.

Што сказаў Лукашэнка

Выказаўся толькі Аляксандар Лукашэнка. ​Лукашэнка лічыць, што мітрапаліт Менска-Магілёўскі Тадэвуш Кандрусевіч «атрымаў пэўныя задачы» ў Польшчы, і таму яго не ўпусьцілі ў Беларусь, перадае БелТА.

«Мы ўважлівым чынам адсочваем ўсіх, хто ўяжджае-выяжджае, — сказаў Лукашэнка падчас паездкі ў Баранавічы. — Кіраўнік Каталіцкай царквы нечакана выехаў для кансультацый у Варшаву і, атрымаўшы пэўныя задачы, вяртаўся Беларусь і трапіў у сьпіс неўязных, агульны ў Беларусі і Расеі. Ня толькі ён адзін, проста гэта больш вядомая фігура».

Тым часам дэпартамэнт грамадзянства і міграцыі МУС, Дзяржаўны памежны камітэт, апарат Упаўнаважанага ў справах рэлігій і нацыянальнасьцяў другі дзень маўчаць.

Генэральны вікарый Менска-Магілёўскай архідыяцэзіі біскуп Юры Касабуцкі выступіў са зваротам.

Што напісана ў законах

У мітрапаліта Тадэвуша Кандрусевіча толькі адно грамадзянства — беларускае. Ён нарадзіўся ў вёсцы Адэльск Горадзенскага раёну.

13 гадоў таму ён прыехаў з Масквы служыць у Беларусь і адмовіўся ад расейскага грамадзянства. Ня выпусьціць з краіны свайго грамадзяніна можна, не ўпусьціць — нельга. Згодна з Законам аб грамадзянстве грамадзяніну Рэспублікі Беларусь ня можа быць адмоўлена ва ўезьдзе ў сваю краіну. Да таго ж гэта канстытуцыйнае права на свабоду перамяшчэньня.

Гэтае права можа быць абмежаванае толькі рашэньнем суду. Аднак толькі на выезд з краіны, не на ўезд. Не ўпускаць у краіну могуць замежных асобаў, асобаў без грамадзянства. Іх могуць прызнаць «пэрсонамі нон-грата» і не ўпускаць у краіну на пэўны тэрмін.

Артыкул 19 Закону «Аб грамадзянстве» прадугледжвае, у якіх выпадках чалавек можа страціць грамадзянства. Да прыкладу, калі асоба паступае на вайсковую службу, службу ў паліцыю, органы бясьпекі, юстыцыі ці іншыя дзяржаўныя органы замежнай дзяржавы пры адсутнасьці асобна прапісаных падстаў.

Пазбавіць грамадзянства ў такім выпадку могуць: — па заяве самога грамадзяніна; — па ініцыятыве органаў унутраных спраў або органаў дыпляматычнай службы.

Апарат Упаўнаважанага ў справах рэлігій: «Камэнтароў ня будзе»

У прыёмнай апарату Ўпаўнаважанага ў справах рэлігій і нацыянальнасьцяў паведамілі, што сам упаўнаважаны Леанід Гуляка на бальнічным. І ніякіх камэнтароў ня будзе. На ўдакладняльнае пытаньне, чаму і хто ўпаўнаважыў так адказваць прадстаўнікам СМІ, жаночы голас адказаў: «Я проста сакратарка», і паклалі слухаўку.

Намесьніца ўпаўнаважанага Алена Радчанка таксама пацьвердзіла, што апарат яго ня будзе камэнтаваць сытуацыю зь мітрапалітам Тадэвушам Кандрусевічам. На пытаньне, навошта тады ў краіне такая ўстанова, калі яна не абараняе інтарэсы кіраўніка Каталіцкай царквы і інтарэсы 20% беларусаў, якія зьяўляюцца каталікамі, Алена Радчанка заявіла: «Вы памыляецеся. Я нічога камэнтаваць ня буду» і таксама паклала слухаўку.

Праваслаўная царква: «Афіцыйных публічных камэнтароў ня будзе»

Прэсавы сакратар Праваслаўнай царквы Сяргей Лепін напісаў на сваёй старонцы ў фэйсбуку:

«Сябры, з нагоды гісторыі зь мітрапалітам Тадэвушам Кандрусевічам ніякіх афіцыйных публічных камэнтароў ні ад уладыкі Веньяміна, ні ад прэс-службы ня будзе. Адказаў на пытаньні аб прычынах такога вы таксама не атрымаеце. Спадзяюся на разуменьне. Мне застаецца толькі ад сябе асабіста выказаць словы брацкай падтрымкі ўсёй каталіцкай грамадзе Беларусі і пажадаць ёй шчасьлівага вырашэньня сытуацыі, няяснай сытуацыі. Дзіўнай і незразумелай сытуацыі! Я спадзяюся на хуткае ўзьяднаньне каталіцкай паствы са сваім першаярархам. Хай усё будзе добра!»

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG